وافق التعليم المفتوح بعد محاولات مستميتة للتحاور معه ، بعد محاولات من موقعنا استمرت أكثر من 25 عاما تم اللقاء ، نعم وافق التعليم المفتوح مشكورا أن يخرج عن صمته وأن يبين للرأى العام سبب صمته ، بعد الظلم البين الذى وقع عليه (حسب قوله) من تلاميذه ناكرى الجميل ، ونترككم مع الحوار حرصا على وقت القارىء ، ووقت التعليم المفتوح فقد علمنا أنه بصدد اجراء عملية جراحية خطيرة نسأل الله عز وجل أن يشفيه وأن يرده الينا سالما غانما قولوا آمين .
الموقع : السلام عليكم سيدى وتحياتى لك
التعليم المفتوح : وعليكم السلام ، تحياتى لك أيضا
الموقع : ممكن تعرف القراء بحضرتك
التعليم المفتوح : أنا اسمى برنامج التعليم المفتوح مواليد عام 1990 جامعة القاهرة ، تخرج على يدى من الطلبة أكثر من نصف مليون طالب وطالبة ،
الموقع: هناك اتهامات وجهت لك من عدد كبير من طلابك لا يستهان بهم ، بالاضافة لاتهامات النقابات لك ، وطلاب التعليم النظامى المنافسين الشرعيين لحضرتك .
التعليم المفتوح: ما هذه الاتهامات؟
الموقع: يقول الطلبة أنك خدغتهم حينما أعطيتهم شهادات لا تؤهلهم لسوق العمل .
التعليم المفتوح : هذا كذب ، فالشهادة معادلة للشهادة النظامية فهى اما بكالوريوس او ليسانس
الموقع: هى فعلا مكتوب عليها بكالوريوس او ليسانس لكن فى الاخر بيتكتب انها بنظام التعليم المفتوح
التعليم المفتوح: وما العيب فى كلمة التعليم المفتوح ؟ التعليم المفتوح شهادة معترف بها مثلها مثل التعليم النظامى والتعليم بنظام الانتساب .
الموقع: ولكن حضرتك هناك نقابات ترفض قيد الطلبة اللى تخرجوا من عند حضرتك بحجة ان نظام حضرتك ضعيف وبيخرج طالب ضعيف ، مع احترامى لحضرتك لكن ده كلام النقابات .
التعليم المفتوح : هذا شىء لا يخصنى أنا أعطيت الطلاب شهادة معتمدة ، هوا أنت عاوزنى أروح للنقابة وأقولها قيدى الطلبة غصب عنك ؟ ما كل الطلبة بتروح النقابات وبتتقيد عادى ومن حق الطالب انه يرفع قضية على النقابة فى حالة رفضها قيده .
الموقع: ولكن حضرتك الطلبة بتقول ان الشهادات دى مكتوب فيها بنظام التعليم المفتوح ، ودة السبب اللى بيخلى النقابات بترفض طلاب التعليم المفتوح المنتسبين لحضرتك وفى طلبة كتير فى الشارع بسبب القرارات الخاصة بالنقابات
التعليم المفتوح : أيوه لازم الشهادة يتكتب فيها بنظام التعليم المفتوح ، لأنى ماينفعش أساوى طالب التعليم المفتوح بطالب النظامى ، لان طالب النظامى بيحضر مع الدكتور مباشرة اما طالب التعليم المفتوح فموش بييجى الا يوم الامتحان ،
الموقع: طب مانتا حضرتك ساويته بالنظامى فى المسمى حيث يكتب ان الطالب حاصل على بكالوريوس او ليسانس ، ليه بقى ماتساويهش بالنظامى فى عدد المحاضرات علشان يبقى بنفس القوة بتاعة طالب النظامى حتى لا يستطيع احد ان يقول له انت طالب ذو خبرة ضعيفة كما يقال عنه
التعليم المفتوح: الجامعات لاتسمح بهذا العدد الضخم من الطلبة فى المدرجات
الموقع: طب ما حضرتك الجامعة بتكسب من التعليم المفتوح كثيرا ،خصوصا ان طالب العليم المفتوح يدرس على حسابه الشخصى بدون دعم من الجامعة فممكن تبنى لهم مبانى فى الجامعة مخصصة للتعليم المفتوح ، بدلا من ان يتم صرف امواله المخصصة له على طلاب التعليم النظامى وعلى دعم الجامعات ، فهو من باب أولى أن يتم الصرف عليه من أمواله المخصصة له وذلك لتدعيم شهادته فى سوق العمل
التعليم المفتوح: مين قالك إن التعليم المفتوح بيكسب هذا كذب ، احنا بنصرف عليه من جيبنا وبندعمه حرصا منا على التعليم المستمر
الموقع: ازاى حضرتك موش بيكسب ، وكلام المسؤولين اللى بيقولوا ان التعليم المفتوح كان مورد هام للجامعات لتطوير الجامعات وانشاء معامل للطلاب النظاميين فى الجامعات المختلفة ؟
التعليم المفتوح: هوا كان بيكسب فى الاول بس ، لكن بعد الدولار مارفع التعليم المفتوح بقى واقف عليا بخسارة
الموقع: ازاى حضرتك والجهاز المركزى للمحاسبات يقول ان هناك خلل فى ميزانية التعليم المفتوح لانه الميزانية المخصصة لتطوير التعليم المفتوح كانت تصرف على هيئة حوافز وهدايا للمسؤولين عن المركز والعاملين فيه
التعليم المفتوح: دى كلها اشاعات وكذب الهدف منها النيل منى
الموقع : ازاى حضرتك كذب والكلام ده نقلا عن الجهاز المركز للحسابات
التعليم المفتوح: انت سمعت من الجهاز المركزى للحسابات شخصيا؟ . أنا قابلته كذا مرة وماجابليش أى سيرة
الموقع: هذا الكلام حضرتك كتب فى جرائد نقلا عن الجهاز المركزى ، والجهاز المركزى لم ينفى وحضرتك لم تنفى؟
التعليم المفتوح:شوف انت بتقول اية ده كلام جرايد؟ موش كل اللى تسمعه تقوله . وبعدين انا موش معقول بعد السن دة كله اكذب انا ليا 25 سنة فى الصنعة
الموقع: صنعة اية حضرتك؟
التعليم المفتوح: قصدى المهنة . مَعْلِهِشّ
الموقع: ماالسبب فى الغاء التعليم المفتوح حضرتك ؟
التعليم المفتوح : لقد وجدنا أن التعليم المفتوح انحرف عن مساره
الموقع : ازاى حضرتك ممكن توضح؟.
التعليم المفتوح: هناك طلاب لا تستحق شهادة البكالوريوس أو الليسانس
الموقع: ازاى حضرتك؟ هوا موش فيه اختبارات للقبول ودى اللى بتبين مدى صلاحية الطالب للدراسة من عدمه ، خصوصا فى كليات زى الاعلام والحقوق ، واى طالب بيقدم بيدفع رسم امتحان قبول 50 جنيه على ما اظن ، ان كنت مخطىء صحح لى؟
التعليم المفتوح : كلامك مظبوط والطلبة نجحت فى اختبارات القبول بس ده موش مقياس ، انا عندى خريجين موش بيعرفوا يكتبوا اسمهم .
الموقع: ازاى حضرتك ؟ انا اعرف ان فى امتحانات هيا اللى بتحدد مستوى كل طالب ومن ينجح فهو يستحق شهادته لأنه جاوب الاجابة الصحيحة ومعنى ان طالب فاشل يحصل على بكالوريوس أو ليسانس بنظام التعليم المفتوح فهذا يدل على وجود خلل فى وضع الامتحان أو تسيب فى اللجنات الامتحانية نفسها مما يسمح بالغش أو عدم دقة فى التصحيح وفى كل الحالات يكون التقصير من طرفكم لا من طرف الطالب الفاشل
التعليم المفتوح: أنت تجادل أكثر مما تسمع ، ألا يكفيك ما قلته لك من أسباب مقنعة؟
الموقع :أنا آسف إن كنت أزعجت حضرتك وقومتك من على الأكل
انتهى اللقاء
تعليقات
إرسال تعليق